يستعد بيت الشعر العربي، بإدارة الشاعر سامح محجوب، لإطلاق الدورة الثانية من "ملتقى بيت الشعر العربى للنص الجديد"، وذلك خلال يومى 2 و3 مايو، فى إطار استكمال التجربة التى حققت حضورًا لافتًا فى المشهد الثقافى خلال دورتها الأولى.
كتافي تقلانة النوبة دي
وانت مابتسألش ليه؟
عيوني دبلانة الساعة دي
والشمس مابتظهرش ليه؟
الحنين قاسم فؤادي
والدنيا ديه قاسية عليه..)
...
قالي يومها وساب إيديا
واتخطف وسط الأيادي
غاب في وسط الزحمة بيا
ومن يوميها ماعدش راضي
كل ما اقوله يا عمي:
قول لقلبي الحب إيه؟
- الحب قاسي، والهجر تيه
الهجر دا نصيبي ومقاسي
بس قُولوا بتسألوني عنه ليه؟..
فتحوا قلبه يشوفوا ماله
جه الطبيب وقال: عياله
وفيه بنيه تشبه النيل ف دلاله
شدناها منه يمكن يبقا أحسن
لكنه كان هيموت، فخوفنا وسيبنهاله
وف ليلتها جات له تتطمن عليه
روحه رجعت بين إيدينا
اتاريه الحب لما
تبقا روحك بين إيدين شخص بعينيه!
وماتسألوش السر إيه!
لو تغيب عنه تغيب الدنيا فيه
الشمس ترحل من على الوادي دا كله
وتطل فوقنا يوم ما بتسلم عليه!
فـ ماتسألوش السر إيه!
سمى نخلة باسمها
وأما كان الريح في لحظة يمسها
يتنفض يجري عليها يحسها
ويمد إيده تضمها
تحنن عليها
ويناديها
لما شوقه يزيد عليه،
وإن يعاتبه الناس يقول: نخلة غالية
وبإيديا زرعتها
غنيت لها
باللي بنا اتكلمي
وصلي صوتي لبيتها
حنني حيطانها
فديتها!
وصلي ليها الغناوي
واوعي تاني تسيبي قلبي
يعملوه الناس حكاوي
قولوا: يالأحباب
افتحوا له مرة باب
ابعتوا لعينيه جواب
القليب م الهجر داب..
وواصفوني وقولوا ليها
دا حبيبك عقله صدى
م الدموع كفه توضى
وف صلاته يدعي ربه
تكبر النخلة في أرضه
وتكبر الحلوة في عينيه..
ويجي يوم يلقى الوصال.
ابقي ردي ع الجريد إن صوته طال
فيه قلوب متألمة، وفيه قلوب تعرف تنام
وانت قاسية ليه كده ما بتدي بال؟
لكني في نهاية الملام
بفكرك، البعد أصعب م السهام
والسلام، السلام هو الختام
مع كل نسمة هوا تهز البيبان
مع كل موجة ترقص النيل بحنان
مع كل نجمة ليها في عيونك مكان
المحبة تزيد و مهما العمر هان
ماتهونيش أبدًا يا عود السيسبان
..
قولت بيني وبيني إيييييييه
اتاريه الحب كان طالل عليه
اتاريه الحب لما
تبقى روحك بين إيدين شخص بعينيه!..
حبيبة الزين
• شاعرة عامية
• حاصلة على ليسانس الآداب قسم الفلسفة جامعة حلوان سنة 2019م
• باحثة ماجستير في قسم الدراما والنقد المسرحي جامعة عين شمس.
• أصدرت ديوانين:
"سيرة الجميز" عن دار فهرس للنشر والتوزيع
"الضلة نصيب" عام 2025 عن الهيئة العامة للكتاب
• حصلت على الجائزة الكبرى (المركز الأول) في جائزة أحمد فؤاد نجم (ساويرس الثقافية) عام ٢٠٢٢م.
• حصلت على جائزة عبد الرحمن الأبنودي في شعر العامية المصرية 2021م من مكتبة الإسكندرية.
• شاركت في العديد من المؤتمرات والندوات الثقافية، ونشر لها قصائد ومقالات نقدية في العديد من المجلات المصرية والعربية.
• تقدم مشروعا ثقافيا تحت عنوان "غِيَّة" للاهتمام بالتراث والفنون القولية في جنوب مصر.
0 تعليق