خرجت الفنانة ألفت عمر في أول ظهور لها بعد وفاة والدها في برنامجها مع ألفت والذي تقدمه على شاشة قناة هي، للحديث عن والدها الراحل الذي وافته المنية في الأيام الماضية ودخلت الفنانة في حالة انهيار شديدة بعد رحيله، وتحدثت بالبرنامج عن آلام الفقد مستعينة بموقفها مع والدها الراحل.
ألفت عمر: الاب مصدر الأمان وفقده بيكسر الضهر
وقالت ألفت عمر في تصريحات رصدها موقع تحيا مصر: الإنسان لما يفقد أبوه بيحس أن ضهره اتكسر، هو مصدر الأمان والحياة بتبقى تقريبا معتمدة بنسبة كبيرة جدا على الأب وأنا بدل ما أطلع ابتسم في وشكم وأضحكم، النهاردة عايزة أشاركوا أحزاني، مع الأسف هشاركوا غصب عني أحزاني في بابا.
وتابعت ألفت عمر حديثها: بشكر كل الناس اللي دعيت له، كان موقف صعب عليا أوي بس كل الناس وقفت جنبي ودعيت له بس ربنا أراد أنه ياخده معاه جنبه في حته أفضل أعذروني النهاردة لو أنا مكنتش كويسة كفاية قدام الكاميرا بس إن شاء الله هكون أحسن وبابا في مكان أحسن ومسألة الوجع دا إن شاء الله هقدر أعديه بدعواتكوا وحضركوا معايا وإن شاء الله روح بابا حواليا فرحانه.
ألفت عمر: المرة اللي فاتت جريت على المستشفى عشان أوري والدي نجاحي لقيته توفى
واختتمت ألفت عمر حديثها، قائلة: المرة اللي فاتت بعد ما خلصت الحلقة الأولى جريت جري على المستشفى عشان أوريه عشان هو كان بيفرح جدا لما بيشوفني في أي حاجة من نجاحاتي فكنت عايزة أرفع من معنوياته وخدت الصور والفيديوهات وجريت عليه عشان أوريهاله بس لقيته متوفي بقاله 3 دقايق وحتى أنا اللي سبلتله عينه، مش عايزة اضايقكوا خالص والله بس اعذروني لو حصل النهاردة مبقاش قد الحدث.
أشرف زكي يدعم ألفت عمر
وحرص الفنان أشرف زكي على دعم ألفت عمر، حيث قام بعمل مداخلة هاتفية لها في برنامجها، قائلا: شيدي حيلك يا حبيبتي كلنا معاكي وزي ما قلتي هو في مكان أحسن بكتير وأنا عايز أقولك إني بشكرك لأنك أديتي واجبك كبنت باره بأبوها وأديتي رسالتك وأنا عارف أنتي عملتي إيه وربنا يصبركوا، وبشكرك مرة أخرى لأنك جيتي تؤدي عملك وتقابلي جمهورك لأن دا دورنا هو دا الفنان، كانوا بيحكولنا دايما الفنانين الكبار، الفنان محمد رضا بنته توفت وطلع يومها بالليل على المسرح وأستاذ عادل إمام دفن والده وراح المسرح والنهاردة أنتي بعد أيام قليلة جدا جدا بتيجي تؤدي دورك لأن أنتي جندي في الميدان جايه تؤدي دورك اللي أنتي مؤمنة بيه وأكيد هو فرحان بيكي.
