قال الإعلامي يوسف الحسيني، إن سداد وزارة البترول والثروة المعدنية، لجزء كبير من مديونات الشركات الأجنبية، دليل على أن مصر لن تتأخر عن سداد أي مديونية مهما كانت، كما أن ذلك "يشجع شركائنا الاستراتيجيين وشركاء الاستثمار سواء في الزيت أو الغاز إنهم يكملوا معانا بل ويزودوا استثماراتهم".

وانتقل "الحسيني" خلال حلقة اليوم من برنامج مساء جديد للحديث عن الاكتشافات الجديدة قائلًا: "خدنا بالنا إنه الحمد لله عندنا اكتشافات مستمرة بسرعة كبيرة خلال الفترة الاخيرة".

وتابع: "سافرنا في أكتوبر اللي فات وطلعنا على الحفار القاهر 2 في بورسعيد، وكان عندنا كشف غاز طبيعي أكتر من رائع والدنيا كلها اتكلمت عنه".

وأضاف: "لما كنا هناك وقابلنا المسؤولين وشركة إيني الإيطالية ووزير البترول المهندس كريم بدوي وقلت له يا رب يجعل وشنا خير عليكم، والحمد لله طلع الكشف الرائع في بورسعيد".

وتابع: "وبعدها رحنا كفر الشيخ على الحفار هناك من حوالي 10 أيام، وقلنا لكم قبل كده عن الزيارة بس ما قولناش النتيجة".

وأوضح: "الحفار ده موجود على البر، لكن الكشف جوه البحر.. وده بيوضح شطارة وكفاءة المهندس المصري اللي بيحفر من البر بزاوية وميول محسوبة لحد ما يوصل لمكان الغاز في البحر".

وأكد: "المكان ده جوه البحر بحوالي 2 كيلومتر، والمهندس المصري بيحفر من البر لحد ما يوصل له، وده دليل على دقة الحسابات وكفاءة التنفيذ".