كنا هنا 

لحظة ما دوّنا تاريخ الكون

كنا هنا 

قبل اختراع الكاميرا والميكرفون

كنا صوت الناس وعينها

ننقل الأحداث على جدران المعابد نقوش

الميلاد والحب وانتصارات الجيوش 

كنا هنا

من أول الدنيا

بننقش على المسلات الطقوس

من أول القربان

للمد والفيضان

بنهدى كل عام للنيل عروس 

كنا هنا 

تحت شمسنا الحنينة الجديدة

بنغنى للحصاد

بنمجد التوحيد

باللحن والتجويد

وبراءة اختراع الناى بتنهيدة

موال وأغنية وقصيدة

كنا هنا 

من كل لحظة يأس نخترع حياة

بنصنع الأمل ونشق بطن الأرض نحفر القناة

متونسين بالشمس فوق مصر البهية

وبنقسم اللقمة مع الفواعلية

من كل شبر ف مصر من كل اتجاه

كنا هنا ودايمًا هنا كبار

ومهما كنا قليلين كتار

بنعمر الصحرا جناين ونكسيها خضار

المصرى قال الحكمة وبدعها 

من كل عتمة بيتولد نهار

كنا هنا 

مع الفجر الجديد

لحظة فك الطلاسم من حجر رشيد

كنا هنا فى كافة الأحوال

نفتح سما الأحلام

للمجد والاستقلال

والفرحة بالحرية

وهنا بناخد صورة جماعية لعهد جديد 

كنا هنا رافعين رسالة للعالم بحاله

شماله شرقه جنوبه وفى كل اتجاه

المصرى لا بيخضع ولا بيضعف ولا يحنى الجباه

بجهودنا من قوتنا جمعنا الزاد

فرضنا كل شروطنا حققنا المراد

وقلوبنا رفرفت مع العلم فى تأميم القناة

كنا هنا

إيدينا فى إيد ولادنا دايمًا بنحى الصمود

ونبنى طوبة طوبة فى جدار النهار

كنا هنا فى كل وقت وكل حين

كنا هنا فى ٢٥ يناير وثورة الملايين

وفى شهر ستة يوم تلاتين

كنا هنا بننقل تمرد شعبنا فى طرد الظلام 

كنا هنا ولسه وحنفضل هنا

بننقل الخطوة الرشيدة

مع شق الطرق فى رحلة العمار 

ولسه اللى جاى كتير

لمصرنا فجر الضمير

والحلم بمصر الكبيرة يصنعه الكبار