يستعد بيت الشعر العربي، بإدارة الشاعر سامح محجوب، لإطلاق الدورة الثانية من ملتقى بيت الشعر العربي للنص الجديد، وذلك خلال يومي 2 و3 مايو، في إطار استكمال التجربة التي حققت حضورًا لافتًا في المشهد الثقافي خلال دورتها الأولى.

تمثال..  لـ  مروة عادل

واحنا ماسكين طرف آخر خيط ما بينا
وبندْعي لله ف الأعالي لعله خير
كانت إيدينا عرقانة بقَدَرْنا
ومسلِّمَانا لفراقنا الأخير
كان قلبك أجير
عند الغياب برضاك
كان قلبي الأسير
عند الوداع بالصمت
كان انهزامنا بديل للحظات انسجام
وقع التحامنا ف اللقا ع الأرض
سقطْ احتمالنا الهش زي القش
قلبك تخطَّى اللحظة وما موجعكش
قلبي انْفرط حبات على رجليك..
كان فص فص وبعدها ما لَحَمش
كام قُبْلَة ذكرى وكان بكاها أجش
وعشان تهش الأمنيات مَوِّتَّها بإديك
اتيتِّمت رغباتي من حواليك..
وعشان أغيب
أقنعتْ نفسي إن البلاد منظر
وإن الوطن ينفع يكونله بدليل
وإن الهوى  دكاكاينه تتمسمر
وإن العواطف سهلة تبقى قتيل
وإن المحبة زيْ ما فيها هابيل
فطبيعي جدا هيبارِزْها قابيل
(ومشيتْ كأني بعترف للسوء، وبعتذر لفضيلتي إني بسوء..)
حبيتك انت..
قولِّي معنى الحب؟!
غير انفلاتنا بِوَعْيِنَا المسلوب
غير  ليل يعدي بغوغائية تفور ..
تكشف وضوحنا المنكسر ف السر
تعرف بإني لسه برضو بحِن
لإيديك وهيه بتكتشف وشي
صِدْق اعترافك لما بتقولي 
"ندرةْ ملامحك لوحة ..ف عصر مش موجود"
فَطَبَعْتِنِي 100 نسخة ع التماثيل
وخلقت ليا معنى ملو وجود
وعَجَنْت جسمي بانفعال بجمَاليون
نَحَتْ مَتْنِي بريشة فيا تِلَوِّن
أول ما دبِّت روحي وغَرِّنِي فِعْلك
شوفت ف عنيا الحب ف ليه امتعض شكلك؟!
وزي أي جالاتيا كسرتني بهجرك
وسيبت بينا طرف خيط مقطوع.