يستعد بيت الشعر العربي، بإدارة الشاعر سامح محجوب، لإطلاق الدورة الثانية من ملتقى بيت الشعر العربي للنص الجديد، وذلك خلال يومي 2 و3 مايو، في إطار استكمال التجربة التي حققت حضورًا لافتًا في المشهد الثقافي خلال دورتها الأولى.

 نُصّ فنّان/ نُصّ موظّف لـ محمد مغاوري 
 

بيعلّم جسمُه يشيل عن جيبه شويّة
يمشي الـ كام كيلو عشان هيوفّر ١٠ جنيه
مش بخل أكيد..
إنّما محفظته مبتشيلهوش..
شايلاه رجليه
برّاه سكاكين بتقطّع فيه..
جوّاه البيت اللي بيبنيه
وفـ راسه عيال فـ حروب واقفين بـ الطّوب للآر-بي-چيه
دنيتُه مش على قد خياله ومش وِسْع عينيه
وعشان حاول أكتر من مرّة يموت..
بقى كل ما يمشي فـ حتّة يشوف كل النّاس بتعزّيه
وأديه بيعلّم نفسُه بـ نفسُه يعيش الدُّنيا
وأديه بيدوس على نفسه ومبتصعبش عليه
نصُّه الفنّان قادر يضحك للعالم لسّه
والنُّص التّاني موظّف شايف إن الأوراق ناقصة
هربان من أي مكان حواليه ومحبوس فـ أوديسّة
متفرّج عابر مش هوميروس ولا بطل القصّة
إنسان بيعاني ويتلخبط والكُلّ ناسيه
بيزُقّ الدُّنيا بـ إيد تتزَقّ
أوقات أعنَف..
فـ العادي أرقَ
خايف من كُتر البُكا يغرَق..
يصرُخ وما يلقاش إلا إيديه
"هوَا أنا عايش؟"
"طب عايش ليه؟"
"مش لازم.. طيّب عايش إيه؟"
"دي الدُّنيا بجد؟"
"ده اللي حلمتُه وقعدت أبنيه؟"
وبيفضل يسأل ومحدّش بيردّ عليه
منَّها لله الكدبة اللي اتلفّت حواليه..
والوهم اللي مسابهوش
كان عامل فيها اللي هيضرب قلمين للدُّنْيا إذا بس تحاول متطاوعوش
كان عامل فيها بوهيمي وميهمُّوش..
وأتاريه بيهمُّه
نُصُّه الفنَّان مطلعْش سليم مـ العاركة وكُلّ النَّاس اتلمُّوا
والعيَّل ده اللي ضاربها طناش بقى فجأة "يا عمّو"
ولا نفعه الجري اللي بيجريه
ولا نفعُه الحلم اللي بيبنيه
كان ناوي يطيّر كام مليون من فوق البُرج
كان ناوي يخلّي بيوت مفتوحة فـ كل مكان
كان ناوي يكون إنسان
لكن زيّ أمّا تقول..
اتخان
عاش عُمره يقول: "هتهون، هتهون"
وأهو هان
عاش عُمره يقول: "هتعدِّي" وعدَّى العُمْر عليه
بقى ماشي فـ كل مكان بـ القصد يوقّع 10 جنيه
علشان يمكن تنجِد إنسان محتاج للـ 10 جنيه.

محمد مغاوري

• من مواليد دكرنس، دقهلية ٢٧ سنة
• تخرج من كلية الآداب قسم الإعلام جامعة المنصورة ٢٠٢٠
• باحث تاريخي
• بدأ الكتابة ٢٠١١
• حصل على المركز الثاني على مستوى الجمهورية عام ٢٠١٤ في مسابقة وزارة الشباب والرياضة
• كتب أغاني لبعض مطربي الأندرجراوند وتتر فيلم قصير بعنوان "زهرة تشرين" - شارك في بعض المهرجانات السينمائية العالمية.
• صدر له:
- من غير ما أعدي على الصراط - ٢٠١٦
- ⁠ڤودكا - ٢٠١٧
- ⁠خيال مآتة - ٢٠١٨
- ⁠طلقتين فالهوا - ٢٠٢٦
• ونشر له قصائد وحوارات صحفية في بعض الصحف أهمها: المصري اليوم، الدستور، روز اليوسف، ڤيتو